यसरी लैजादैं छन् डन विदेशमा अवैध सम्पत्ति

काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) को अनुसन्धानपछि सम्पत्ति शुद्धीकरण विभागले कुख्यात पाँच जना डनविरुद्ध विशेष अदालतमा मुद्धा दायर गर्‍यो । उक्त घटनापछि अन्य डनहरुको पनि अवैध सम्पत्ति छानविन हुने विश्वास लिइएको थियो । सम्पत्ति शुद्धीकरणको मुद्धा विशेष अदालतमा पेश हुनु त परको कुरा, अहिलेसम्म पहिलो, दोस्रो र तेस्रो श्रेणीमा परेका कथित डनका अवैध सम्पत्तिमाथि छानविन भएको छैन् । जसका कारण नेपालमा अवैध काम गरेर कमाएका कालोधन पछिल्लो समयमा अधिकांश डनहरुले विदेश लैजाने क्रम बढेको छ । नेपालमा डनको उपाधी पाएका एक दर्जन भन्दा गुण्डाहरुले त विदेशमै ब्यापार, ब्यवसाय सुरुवात गरिसकेको स्रोत बताउँछ । नेपाल प्रहरीको खोजी सूचीमा परेका अधिकांशले अहिले छिमेकी मुलुक भारत, श्रीलंका बाहेक अष्ट्रेलिया, दुवई, जापान, यूकेलगायतका मुलुकमा व्यवसाय गरिरहेका छन् ।

स्रोतका अनुसार उनीहरुको क्यासिनो, क्लब, होटल, रेष्टुरामा लगानी रहेको छ । तर त्यसप्रति नेपाल प्रहरीको केन्द्रीय अनुसन्धान ब्यूरो (सीआईबी) को अहिलेसम्म ध्यान पुग्न सकेको छैन् । पाँच जना डनको सम्पत्ति छानविनपछि विशेष अदालतमा मुद्दा दायर गरेसँगै अन्य डनको भागदौड मच्चियो । उक्त घटना उनीहरुलाई अहिले सम्पत्ति लुकाउने बहाना मात्र बन्न पुगेको छ । राजधानीकै कुख्यात डन मानिएका दिनेश अधिकारी उर्फ चरी, कुमार श्रेष्ठ उर्फ घैंटेको प्रहरी ईन्काउण्टरसँगै प्रायजसो चर्चित डनले मुलुक छाडिसकेका छन् । तर उनीहरुले साथमा अवैध तरिकाबाट कमाएको करोडौं रुपैयाँ विभिन्न माध्यामबाट लैजाने क्रम पनि बढेको छ ।

केहि बर्ष पहिले राजधानीमा चर्चित डन मानिएका दिपक मनाङ्गे, मिलन चक्रे, गणेश लामा र राजधानी बाहिरका डनद्धय पर्शुराम बस्नेत र अभिषेक गिरीविरुद्ध विभागले विशेष अदालतमा मुद्धा दायर गरेको थियो । पाँचै जना डनको मुद्दा सुनवाईपछि विशेष अदालतले उनीहरुलाई धरौंटीमा रिहा गर्‍यो । उनीहरुको मुद्दाको अहिलेसम्म छिनोफानो भएको छैन् । सरकारको गैरजिम्मेवार कदम र निगरानी नगर्ने प्रहरीको कदमले अन्य डनहरुलाई भने सम्पत्ति लुकाउने र विदेशमा लगानी गर्ने बाटो खुलेको हो । विगतमा कुनै हैसियत र पुखौंली सम्पत्ति नभएका डनहरूको जीवनमा आश्चर्यजनक परिवर्तन आएपछि विभाग र सीआईबीले अनुसन्धान थालेको थियो । अहिले उक्त अनुसन्धान रोकिएको छ । विभाग र सीआईबीले अनुसन्धान गरि अवैध सम्पत्ति थुपार्नेलाई कारवाही नगर्दा गुण्डागर्दी गर्ने, क्यासिनोमा अवैध लगानी गर्ने, ठेक्कापट्टाबाट कमिशन लिने, हप्ता असुली गर्ने, अपहरण, फिरौती गर्ने, अवैध रुपमा कानुनले बर्जित ब्याज लिई लगानी गर्ने, बालुवा र रक्तचन्दन तस्करीबाट करोडौं सम्पत्ति थुपारेका गुण्डा, तस्कर, दलाल, माफियाले भने उन्मुक्ति पाएका छन् । अवैध तरिकाबाट सम्पत्ति आर्जन गर्ने दर्जनौं रहेका छन् । क्यासिनोमा जुवाडेलाई अवैध लगानी गर्ने विरेन्द्रलाल श्रेष्ठ, बलराम सापकोटा उर्फ ‘बले’, कविन शाक्य, अरुण सेढाँईलगायत छन् । त्यसैगरी, गुण्डागर्दी, हप्ता असुली, अपहरण, फिरौंती, ठेक्कापट्टालगायतमा ब्यापारीलाई धम्क्याएर पैसा असुलेर कमाउनेमा काजी शेर्पा, रमेश बाहुन ( जो हाल थुनामा रहेका छन्), तेजेन्द्र गुरुङ, कुमार घैंटे (प्रहरी ईन्काउण्टरमा मारिएका ), साजन महर्जन, दिनेश अधिकारी उर्फ चरी (प्रहरी ईन्काउण्टरमा मारिएका ), विष्णु लामा, दावा लामा, समीरजंग बस्नेत, प्रवेशमान शाक्य, संजय डंगोल, सशी अधिकारी, अभिमानसिंह बस्नेत, संजिव लामा, अमित लामा, अजयमान श्रेष्ठलगायतको अवैध सम्पत्तिमाथि सीआईबीले अहिलेसम्म अनुसन्धान थालेको छैन् ।

 प्रधानमन्त्री केपी शर्मा ओलीका धर्मपुत्र बताउने बलराम सापकोटा उर्फ बले रक्तचन्दन तस्करी हुँदै क्यासिनोमा अवैध लगानी गरेर करोडौं कमाउने अर्का खेलाडी हुन् । उनीसँग अर्ब बढी रकम रहेको स्रोत बताउँछ । उनले प्रधानमन्त्री ओलीलाई ‘बा’ भन्ने गरेका छन् भने उनलाई प्रधानमन्त्रीकै संरक्षण रहेको छ । प्रधानमन्त्री हुनअघि ओली मुलुकभरको कार्यक्रममा जाँदा बलेको गाडिमा सवार हुन्थे । आपराधिक पृष्ठभूमिबाट ठेकेदार बनेका काजी शेर्पा यतिखेर ब्यवसायी बनिसकेका छन् । उनीसँग समेत करोडौं रुपैयाँ रहेको छ । जुवाडेलाई लगानी गर्ने कविन शाक्य, अरुण सेढाँई, डनको पनि डन मानिने रमेश बाहुन, तजेन्द्र गुरुङ, दिनेश अधिकारी, कुमार घैंटे, साजन महर्जन, विष्णु लामा, दावा लामा, समीरजंग बस्नेत प्रवेशमान शाक्य, संजय डंगोल, सशी अधिकारी, अभिमानसिंह बस्नेत, संजिव लामालगायतसँग समेत करोडौं अवैध रुपैयाँ रहेको छ । ईन्काउण्टरमा मारिएका डनद्धय सम्पत्ति अहिले यति र उति भन्दै आउँछ । तर उनीहरुको कालो धनलाई राष्ट्रियकरण गर्ने अभियान प्रहरी संगठनबाट हुन सकेको छैन् । अन्य दर्जनौं कथित डन, तस्कर, दलालहरुलाई सम्पत्ति शुद्धीकरण अनुसन्धान विभाग र सीआईबीले अनुसन्धान गरी थप मुद्दा चलाउने प्रयास अहिलेसम्म गरेको छैन् । कारण यि सबै गुण्डा, दलाल, तस्कर र माफियालाई राजनीतिक संरक्षण रहेको छ । गैरकानुनी कार्य र कसुर गरी कमाएको सम्पत्तिको बास्तविक स्रोत र उत्पत्ति पत्ता लगाई सम्पत्ति शुद्धीकरणमार्फत आतंकवादमा भएको वित्तिय लगानीलाई नियन्त्रण गर्ने उदेश्य बमोजिम गठन भएको सम्पत्ति शुद्धीकरण अनुसन्धान विभाग सुस्ताएको छ । उता पहिलो पटक चर्चामा रहेका डनहरूविरुद्ध अनुसन्धान गरी अभियोजन तयार गर्ने सीआईबी समेत पछिल्लो समयमा डनहरुले अवैध सम्पत्ति विदेश लगिरहँदा समेत बेखबर बनिरहेको छ ।

Share on Twitter Share on Facebook